Խավյեր «Չիչարիտո» Էրնանդես Բալկասարը ծնվել է 1988թ. հունիսի 1-ին Գվադալախարա քաղաքում` իր ֆուտբոլային ավանդույթներով հայտնի մի ընտանիքում: «Չիչարիտո» մականուն ստացած Խավյեր Էրնանդես Բալկասարը 1986թ-ի աշխարհի առաջնությանը մասնակցած Մեքսիկայի հավաքականի հայտնի ֆուտբոլիստ Խավյեր Էրնանդես Գուտյերեսի որդին է և «Չիվասի» լեգենդ ու 1954թ-ի աշխարհի առաջնությանը մասնակցած Թոմաս Բալկասարի թոռն է: Մի խոսքով, ընտանիքը ֆուտբոլային է ու բացի այդ բոլոր «Չիչարիտոները»` պապը, հայրն ու ինքը` հարձակվողներ են: Մականունը փոխանցվել է հորից, որին գիտեին որպես «Չիչարո» (իսպաներեն` սիսեռ)`աչքերի հետաքրքիր կանաչ երանգի համար: Ու թեև Խավյերի աչքերն ամենևին էլ զմրուխտագույն չեն, բայց նա «դատապարտված էր» դառնալ Չիչարիտո, այսինքն փոքրիկ սիսեռ:

9 տարեկան հասակում Էրնանդեսը սկսեց ֆուտբոլ պարապել տեղական «Գվադալախարա» ակումբում: 2006թ. կայացավ նրա դեբյուտն այդ թիմի կազմում` «Նեկակսի» դեմ խաղում: Փոխարինման դուրս գալով հանդիպման 87-րդ րոպեին, երբ հաշիվն արդեն 3-0 էր, երիտասարդ հարձակվողը հինգ րոպե անց չորրորդ անգամ գրավեց մրցակցի դարպասը:

Ոչ միանգամից, բայց Էրբաբդեսին նկատեցին և այսօր նրա արդյունքները տպավորիչ են: 2009/10 մրցաշրջանում նա ակումբի կազմում 21 գոլ է խփել 28 հանդիպումներում, ինչպես նաև աչքի է ընկել Մեքսիկայի հավաքականի կազմում 4 գոլերով ու 4 գոլային փոխանցումներով: 174 սանտիմետր հասակ ունեցող ֆուտբոլիստին դժվար է անվանել աշխարհի ամենաբարձրահասակ հարձակվողներից մեկը, բայց նա չափազանց արագ է ու լավ գիտի, թե ինչպես է հարկավոր գոլեր խփել:

2010թ. ապրիլի 8-ին «Մանչեստեր Յունայթեդը» հայտարարեց Չիչարիտոյի տրանսֆերի մասին և Անգլիայում աշխատանքի թույլտվություն ստանալուց ու իր նոր թիմին հուլիսի 1-ին միանալուց հետո նա դարձավ առաջին մեքսիկացին «Օլդ Թրաֆֆորդում»: