Անցած խաղաշրջանի նշանակալի մասը սերբը բաց թողեց ծնկի վնասվածքի պատճառով: Ընդ որում հիվանդանոցում քիչ չէին Ալեքս Ֆերգյուսոնի սաները, ուստի մարզիչն ակտիվորեն օգտագործեց երիտասարդության ներուժը: Հիմա «ՄՅՈՒ»-ի ավագը շարք է վերադարձել, եւ պատրաստ է մրցաշրջանին:

«Անցած խաղաշրջանում մեր երիտասարդությունը շատ հանդիպումներ անցկացրեց, շատ բան յուրացրեց: Բոլորս էլ շատ բան սովորեցինք,- ասել է Վիդիչն ակումբի կայքում:- Վերջին տարիներին Եվրոպայում երեք եզրափակիչներով, կիսաեզրափակիչներով քիչ հաջողությունների չենք հասել եւ, գուցե, այս տարի մեզ թուլանալու ճոխություն թույլ տվեցինք, ինչի համար պատժվեցինք: Հիմա չպետք է թույլ տանք, որ այդ պատմությունը կրկնվի: Այո, գարնանը շատ վնասվածքներով խաղացողներ կային, բայց հուսով եմ, որ հիմա բոլորն առողջ են, իսկ երիտասարդությունն էլ՝ կարեւոր փորձառությամբ հմտացած: Վստահ եմ, որ այս մրցաշրջանում ավելի լավ կխաղանք»: